Ungarn góðkennir finskan Nato-limaskap

Ungarska tjóðartingið hevur samtykt umsóknina hjá Finnlandi um at gerast limur í Nato.

Avgerðin var væntað.

Stjórnarflokkurin Fidesz boðaði fyri nøkrum døgum síðani frá, at hann fór at taka undir við finsku umsóknini, og tað gjørdi so eisini tjóðartingið, skrivar NTB.

Bæði Turkaland og Ungarn hava verið ivingarsom um Nato-limaskapin hjá bæði Finnlandi og Svøríki, men eftir at finski forsetin, Sauli Niinistö, vitjaði Turkaland fyri tveimum vikum síðani, kom gongd á finsku umbønina. 

Eftir vitjanina í Turkalandi, boðaði forsetin, Recep Tayyip Erdogan, frá, at hann var fyri finskum limaskapi. Hetta fekk síðani ungarska stjórnarflokkin at taka somu støðu.