Skalvalop í Norra kravt mannalív

Í trimum ymsum norðurnorskum kommunum hava fýra fólk latið lív í skalvalopi, og tað hevur fingið borgarstjórarnar í Lyngen, Nordreisa og Karlsøy kommunum at gera vart við seg.

Teir hava biðið um fund við tríggjar ráðharrar í norsku stjórnini fyri at kunna teir um støðuna.

- Vit vilja vísa teimum, hvussu álvarslig støðan hjá okkum er, sigur ein av borgarstjórunum, Dan-Håvard Johnsen í Lyngen kommunu.

Hann heldur, at neyðugt er við eini ætlan fyri alt landið, ið skal forða fyri, at skalvalop krevja mannalív.

Ikki minst uppliva hann og hinir borgarstjórarnir, at ferð eftir ferð fara túsundtals fremmand ferðafólk í fjallaøkini, har lívsvandi kann standast av at ferðast.

Eisini har norðuri í Svøríki gera skalvalop um seg, og hóast støðan ikki hevur verið so álvarslig sum har norðuri í Norra, verða fólk ávarað ímóti at fara í fjøllini, har vandi kann vera fyri skalvalopi.