Russland styrkir herin við finska markið

Russland hevur longu gjørt vart við seg, eftir at Nato-aðalskrivarin, Jens Stoltenberg, fyrr í dag boðaði frá, at Finnland fær limaskap í Nato í morgin.

Russiski varauttanríkisráðharrin, Aleksandr Grusjko, sigur, Russland fer at styrkja herin fram við finska markinum.

- Fara Nato-herdeildir til Finnlands, taka vit neyðug stig at verja russisku trygdina, sigur varauttanríkisráðharrin við tíðindastovuna, Ria Novosti.

Markið millum Russland og Finnland er 1300 kilometrar.

Finnland verður 31. limalandið í Nato.