Thule Air verður Pituffik Space

Thule Air Base í Grønlandi fær eitt nýtt alment heiti.

Tað skrivar Sermitsiaq.

Herstøðin skal í staðin eita Pituffik Space Base. Tað hava amerikanarar í samstarv við Grønland gjørt av. 

Navnabroytingin verður 70 ár eftir at herstøðin varð bygd, og nú grønlendskur arvur verður fagnaður hesa vikuna á sokallaðu "Greenland Heritage Week".

Avtala millum Danmark og USA

Thule Air Base varð bygd í loyndum í samband við, at Danmark og USA gjørdu nýggja verjuavtalu í 1951, sum varð gjørd í staðin fyri Grønlandstraktatina frá 1941, tá tað bleiv loyvt at seta verjuøki á stovn í Grønlandi.

Um hetta mundi var Grønland enn koloni hjá Danmark, og av tí at pláss skuldi gerast fyri nýggju herstøðini, vórðu 116 fólk flutt av staðnum til bygdina Qaanaaq. 

Tá varð sagt, at fólkini fluttu av egnum fríum vilja, men í 1980'unum bleiv hvassliga funnist at mátanum hetta varð gjørt. 

Í 2003 dømdi Landsrætturin endaliga, at tey 116 fólkini høvdu verið fyri órætti - og tey fingu eisini eina almenna umbering frá danska forsætisráðharranum.