Netanyahu hálsar um

Ísraelski forsætisráðharrin Benjamin Netanyahu kom í harðan andróður, tá hann fyri tveimum vikum síðan ætlaði at koyra verjumálaráðharran Yoav Gallant úr starvi.

Men nú hevur Netanyahu hálsað um. Í eini sjónvarpaðari røðu í gjárkvøldið boðaði hann frá, at Gallant verður sitandi kortini.

"Eg havi gjørt av at leggja ósemjurnar aftur um okkum, og Gallant heldur fram við at arbeiða fyri trygdini hjá borgarunum í Ísrael," segði Benjamin Netanyahu.

Yoav Gallant, sum ongantíð fekk nakra formliga uppsøgn, legði seinni eina mynd av sær og Netanyahu út á sosialar miðlar og skrivaði "Vit halda fram saman við fullari megi fyri Ísrael."

Ætlanin at koyra Gallant frá fyri tveimum vikum síðan førdi til stór mótmæli. Mett varð, at Netanyahu setti persónlig áhugamál fram um ísraelsku trygdina í eini tíð við nógvum ófriði í landinum og rakettálopum úr Gaza, Libanon og Sýria.