Jóhanna kláraði oyggjaleikakravið

Atlantic Open var síðsti kjansur at klára kravtíð til Oyggjaleikir, og Jóhanna Ólavsdóttir úr Fuglafjarðar Svimjifelag tók av.

16 ára gamli svimjarin úr Fuglafjarðar Svimjifelag rakk málinum longu fríggjakvøldið í 200 metur firvaldsvimjing.

 - Eg var nervøs næstan allan dagin. Í skúlanum var tað einasta, eg hugsaði um, hvørjar tíðir eg skuldi raka, sigur Jóhanna Ólavsdóttir.

Hon hevur svomið mest blandað, men í ár hevur hon lagt seg meir eftir firvaldssvimjing á 200 metra teininum, og nú gleðir hon seg til Oyggjaleikirnará Guernsey, sum byrja 8. juli. 

 - Eg hopi, at tað fer at ganga gott. Eg fari at royna at forbetra meg til 200 firvald og taka nøkur sekund av, sigur Jóhanna Ólavsdóttir.


Sjey hava klárað kravið

Umframt Jóhannu Ólavsdóttir hava Alisa Vestergaard, Eyðrið Mortensen, Vár E. Eidesgaard og Elisabeth Erlendsdóttir klára kravtíðina til Guernsey. Hjá monnum eru tað bert Róland Toftum og Bartal E. Eidesgaard, sum hava svomið undir kravtíðina.

 - Tað hevur gingið væl - eg hevði ynskt, at tað gekk eitt lítið sindur betri, so vit høvdið fingið nakrar svimjarar, sum vóru øgiliga nær við, innum sperrumarkið, sigur formaðurin í Svimjisambandinum, Rókur í Jákupsstovu.

Ein av hesum er Lea Osberg Højsted úr Ægir. Hon setti føroyskt met í 100 metur bringu, men var fimm hundraðpartar frá kravtíðini til Guernsey. 

 - Vil mann vera við í stafettini í fýra ferðir hundrað blandað, so má mann hava ein góðan bringusvimjara við. Tað hava vit hjá monnum, men hjá kvinnum kann tað gott verða, at tað verður viðkomandi, sigur Rókur í Jákupsstovu.

Starvsnevndin og landsliðsvenjarin fara nú at manna endaliga svimjihópin, og hóskvøldið verður kunngjørt, hvør er við.