Verjumálaráðharrin: Draga eina línu í trygdarspurningum

Troels Lund Poulsen, virkandi verjumálaráðharri, er meira sannførdur um, at Føroyar og Danmark draga eina línu, tá ið um ræður trygdina hjá ríkisfelagsskapinum.

Tað sigur hann í tíðindaskrivi hjá Verjumálaráðnum eftir fundin við Høgni Hoydal í gjár.

Hann vil hava landsstýrini í Føroyum og Grønlandi og fólkatingsfólkini úr báðum londum við, tá ið nýggja verjusemjan skal gerast.

Troels Lund Poulsen fegnast eisini um semjuna, sum var gjørd í juni í fjør, um nýggja radaran á Sornfelli.

Hann skal hava eftirlit við loftrúminum millum Ísland, Noreg og Bretland, og røkkur 300 til 400 kilometrar.