Jens Stoltenberg heldur helst fram

NATO-aðalskrivarin, Jens Stoltenberg, verður sitandi í sessinum til næsta summar.

Tað siga vælvitandi keldur við norska kringvarpið, NRK.

Áður hevur verið sagt, at Jens Stoltenberg fer at leggja frá sær 1. oktober í ár.

- At finna ein nýggjan aðalskrivara, sum er klárur at taka við longu í heyst, verður alsamt minni sannlíkt fyri hvønn dag, sum gongur, sigur ein kelda við NRK.

Jens Stoltenberg hevur fleiri ferðir gjørt greitt, at tíð hansara sum NATO-aðalskrivari nærkast endanum, og hann kom ikki við nýggjum upplýsingum, tá ið hann í gjár vitjaði á Ramstein-flogstøðini í Týsklandi.

- Eg havi ongar aðrar ætlanir enn at enda mítt arbeiði í NATO í heyst, sum ætlanin hevur verið, segði hann og vísti á, at hann longu hevur sitið sum aðalskrivari tvær ferðir so leingi sum ætlað.