Forsætisráðharrin: Ný Sæland fer at loysa frá Bretlandi

Stendur tað til nýggjan forsætisráðharran í Ný Sælandi, fer landið at loysa frá bretska kongsvaldinum og gerast lýðveldi.

Chris Hipkins, forsætisráðharri, sigur við AP-tíðindastovuna, at í besta føri fer Ný Sæland við tíðini at gerast sjálvstøðugt land.

Viðmerkingin kom bert fáar tímar fyri, at Hipkins fór til Bretlands at verða hjástaddur, tá Charles kongur verður krýndur.

Ný Sæland hevur sum fyrrverandi bretskt hjáland sjálvstýri, men á pappírinum er Charles kongur ríkisovasti. 

Hipkins ætlar tó ikki at skunda undir, at Ný Sæland gerst sjálvstøðugt, meðan hann er forsætisráðharri.