Avgreiða málini um starvsheiti, veiðigjald og tøkugjald í dag

Fimm mál skulu avgreiðast endaliga á tingfundinum í dag kl.10.00.

Tey eru lógaruppskotini um starvsheitini í løgtingi og landsstýri, veiðigjald, tøkugjald og grundvatn.

Løgtingið skal eisini viðgera skrivliga fyrispurningin hjá Liljuni Weihe til ríkisumboðið um føroyskar fangar og varðhaldsfangar í Danmark. Svarið er komið og skal viðgerast á tingfundinum í dag.

Sum skilst verður eingin tingfundur aftur í bræði.

Fleiri mál eftir

Men tingfundur verður fyri ólavsøku, tí fíggjarnevndin hevur trý mál eftir.

Tey eru uppskotini um at broyta kapitalvinningsskattalógina, uppskotið um fyrsta byggistig, nú skúlabygningarnir á Frælsinum í Havn skulu umvælast og umbyggjast, og uppskotið til samtyktar um at gera greiðar reglur um, hvussu almennar byggiverkætlanir skulu skipast.  

Nevndarfundur í næstu viku

Fíggjarnevndin hevur fund mikudagin í næstu viku. 

Tá eru trý landsstýrisfólk og løgmaður boðsend.   

Landsstýriskvinnan í heilsumálum og Landssjúkrahúsið hava fingið fundarboð, tað hava landsstýrismaðurin í fiskivinnu- og samferðslumálum og Landsverk, landsstýriskvinnan í fíggjarmálum og løgmaður eisini.