Ávara ímóti at slíta fiskiveiðisamstarvið við Russland

Fiskimannafelagið heitir staðiliga á landsstýrið um at hava álvarsomu menniskjaligu avleiðingarnar í huga, um Føroyar slíta fiskiveiðsamstarvið við Russland.

Sambært Føroya Fiskimannafelag missa 250 fiskimenn livibreyðið, um fiskiskapurin í Barentshavinum heldur uppat.

Tað skrivar felagið í tíðindaskrivi.

Fiskimannafelgið fordømir russisku innrásina í Ukraina, og felagið tekur eisini undir við fíggjarliga stuðlinum, sum Føroyar hava latið, og avgerðini um at taka ímóti ukrainskum flóttafólki.

Eiga at umhugsa støðuna

Felagið heldur, at tað er neyðugt at umhugsa støðuna við framhaldandi samstarvinum við Russland um fiskiveiðu í russiska partinum av Barentshavinum og fiskiskapin hjá russum í føroyskum sjóøki, umframt teirra virksemi í føroyskum havnum.

Men felagið heldur tað vera hugstoytt, at landsstýrið umhugsar at slíta týðandi fiskivinnusamstarvið við Russland uttan so mikið sum at hoyra Føroya Fiskimannafelag. 

Heldur lata landsins myndugleikar álitið upp í hendurnar á bólkum við embætisfólki, sum útgreina búskaparligu avleiðingarnar, sum almenningurin tó ikki hevur fingið innlit í.

Fiskimannafelagið skrivar, at møguliga javnviga virðini av pelagisku veiðini í Føroyum við virðini av botnfiskakvotunum í Barentshavinum í rokniarkinum hjá akademikarum í embætisbólkum, men hjá limunum í fiskimannafelagnum er eingin ivi. Slíta Føroyar fiskivinnusamstarvið í Barentshavinum, missa 250 fiskimenn og familjur sítt livibreyð.