15.000 milliardir í norska oljugrunninum

Tann sonevndi norski Oljugrunnurin fór í morgun upp um 15.000 milliardir norskar krónur. Tað skrivar NRK í dag.

Tað svarar til meir enn 9.600 milliardir danskar krónur í dagsins kursi. 

Tað merkir eisini, at parturin hjá hvørjum einstøkum norðmanni í grunninum er meir enn 1,7 milliónir krónur í okkara gjaldoyra.

Statens pensjonsfond utland, sum er almenna heitið á Oljugrunninum, fekk sínar fyrstu pengar í 1996, eftir at norska Stórtingið í 1990 samtykti at stovna grunnin fyri tryggja, at stóru inntøkurnar av olju ikki skaptu ójavnvág í norska búskapinum.

Síðan tá eru norsku oljuinntøkurnar settar í grunnin, sum nú er komin upp um 15.000 milliardir norskar krónur. Men hesar inntøkurnar standa tó bert fyri sløkum helminginum av øllum virðinum í grunninum. Størri parturin er komin inn av íløgum í partabrøv, fastogn og grøna orku.

Og sum navnið á grunninum sigur, ger hann bert íløgur uttanlands og ikki í Noregi.

Oljugrunnurin er ein av heimsins størstu grunnum og eigur í nærum 1,5 prosentum av øllum heimsins børsskrásettu fyritøkum, stendur á heimasíðuni hjá grunninum, nbim.no, har ein teljari eisini vísir, hvussu nógvir pengar eru í grunninum júst nú.