Íbúðir til 500 fólk oman fyri Argjahamar

Tórshavnar kommuna lýsir eitt øki oman fyri Argjahamar til sølu til íbúðabygging.

Økið er umleið 3.740 fermetrar til støddar, og har skulu byggjast 11 íbúðarbygningar við í mesta lagi fýra hæddum.

Lendið oman fyri Argjahamar er flokkað eitt øki, ið hóskar væl til býarvøkstur, sigur Tórshavnar kommuna. 

Økið er í kommunuætlanini lagt av til framtíðar býarvøkstur saman við økinum við Stórutjørn. Heildarætlanin fyri Stórutjørn er í gerð.

Heildarætlanin fyri Argjahamar fevnir um matrikkul 256, ið er tilsamans 132.000 ferðmetrar til støddar, og útbodna økið er partur av hesum matrikkli. 

Lendið er oman fyri bústaðarøkið Klingurstjørn, Skúlan á Argjahamri, Dagstovnin á Hamrinum og bústaðarøkið á Argjahamri. 

Umboða breiðan málbólk

Økið skal, sambært heildarætlanini hjá kommununi, umboða breiðan málbólk í samfelagnum við ymiskum bústaðarsløgum, bústaðarstøddum og eigaraviðurskiftum. 

Eisini verður pláss fyri einstaklingavirkjum, smásølu og tænastum innan heilsuøkið.

Partur av lendinum verður boðin út til privatar arbeiðstakarar at menna, og nakað verður boðið út sum kommunalar útstykkingar. 

Samlaða økið verður skipað í sjey bústaðarøki. Mett verður, at tá øll økini í heildarætlanini eru bygd, verður pláss fyri umleið 500 fólkum, ið svarar til eina hækking upp á 20 prosent av verandi fólkatalinum á Argjum, skrivar Tórshavnar kommuna.

Freistin at lata inn tilboð er 8. juni á middegi