- Tíðindi, mentan og ítróttur
143 milliardir til verjuendamál næstu 10 árini
![](https://kvf.fo/sites/default/files/styles/grein-ovasta-mynd/public/troels_lund_poulsen.jpg?itok=wBUo4m6e)
Danska stjórnin fer næstu 10 árini at brúka 143 milliardir krónur til íløgur í verjuna.
Og fyri 2030 lýkur Danmark málið hjá Nato um at brúka tvey prosent av BTÚ til verjuendamál.
Virkandi verjumálaráðharrin, Troels Lund Poulsen, hevur lagt uppskotið fram, og samráðingarnar byrja í hesi vikuni.
105 av teimum 143 milliardunum fara til nýggjar 'verju- og trygdarpolitiskar raðfestingar'.
Síðani skulu ítøkilig átøk samtykkjast í heyst og seinni, sigur verjumálaráðið.
Tríggjar raðfestingar
Stjórnin hevur víst á tríggjar raðfestingar á økinum: Ríkisfelagsskapurin, nærøkini í eystri og á átøk í økjum úti í heimi, har ósemjur eru.
Danska stjórnin fer eisini at játta umleið 22 milliardir krónur aftrat í hernaðarhjálp til Ukraina.
Uppskotið merkir, at Danmark í 2030 lýkur málið hjá Nato um at brúka í minsta lagi tvey prosent av bruttotjóðarúrtøkuni til verju og trygd.
Fíggingin er avgreidd, og nú vónar virkandi verjumálaráðharrin skjótar samráðingar, og at semja fæst um karmarnar fyri verjuna fyri Nato-toppfundin í Vilnius í juli.