Óvist nær Ukraina sleppur upp í Nato

Nato-londini eru sinnað at bjóða Ukraina limaskap í verjusamgonguni.

Men fyribils ber ikki til at siga, nær Ukraina kann gerst limur, tí Jens Stoltenberg, aðalskrivari í Nato, hevur onga ítøkiliga tíðarætlan um tað.

Tíðindafundur var í dag í sambandi við Nato-uttanríkisráðharrafundin í Oslo.

- Vit hava tosað um ukrainsku vónina um limaskap, og øll okkara sameindu taka undir við at lata dyrnar upp fyri nýggjum limaskapi. Øll sameindu okkara vóru eisini á einum máli um, at tað eru Nato-lond og Ukraina, sum gera av, nær Ukraina verður limur. Tað verður ikki Moskva, sum hevur sýtingarrættin fyri nýggjum limaskapi í Nato, segði Stoltenberg.

Fer til Turkalands

Jens Stoltenberg fer til Turkalands í eini roynd at fáa landið at góðtaka umsóknina hjá Svøríki um limaskap í Nato.

Stoltenberg sigur, at hann fer til Ankara fyrsta dagin.

- Vit mugu minnast til, at øll sameind, -eisini Turkaland, bjóðaðu Svøríki at gera fullgildugur limur. Tað var á Nato-fundinum í Madrid í fjør. Og higartil hevur tað verið ein skjót tilgongd, tí Finnland og Svøríki søktu um limaskap í mai ella juni. Bæði Finnland og Svøríki vóru boðin uppí. Finnland fær fullgildugan limaskap, og eg eri sjálvandi vísur í, at Svøríki eisini verður limur sum skjótast. 

- Boðskapurin hjá mær er, at svenska umsóknin um Nato-limaskap er góð fyri Svøríki, fyri Norðurlond og fyri Baltikum,  men eisini fyri alt Nato. Tað ger Nato sterkari, og tað hevur eisini týdning fyri Turkaland, sigur Stoltenberg.