Pence bjóðar Trump av

Fyrrverandi amerikanski varaforsetin, Mike Pence, hevur nú boðað frá,, at hann fer at royna at gerast republikanskt forsetavalevni í 2024.

Harvið bjóðar hann fyrrverandi forsetanum, Donald Trump, av í kappingini um at gerast valevni hjá republikanarunum.

Sum varaforseti var Mike Pence leingi trúfastur móti Donald Trump, men tá ið Trump royndi at ógilda úrslitið av forsetavalinum í 2020, sum Joe Biden vann, vildi Pence ikki stuðla Trump longur.

Síðan álopið á kongressina 6. januar í 2021 hevur Mike Pence tikið alsamt størri frástøðu frá Trump. Mike Pence og familja hansara vóru í Capitol-bygninginum, tá álopið hendi, og Pence hevur sagt, at við at eggja fólki til at leypa á kongressina, setti Trump familjuna hjá sær í vanda.

Mike Pence, sum verður 64 ár í morgin, 7. juni, hevur eisini verið guvernørur í Indiana árini 2013-2017, og hann sat eisini í amerikanska umboðsmannatinginum frá 2001 til 2013.