Stór vatnflóð í Kherson-landspartinum

Í minsta lagi sjey fólk eru ikki komin afturíaftur eftir vatnflóðina í kjalarvørrinum á spreingingini av stóru byrgingini við Nova Kakhovska í Kherson-landspartinum í Ukraina.

Nógv fólk eru rakt av stóru vatnflóðini, og mett verður, at fólk í túsundatali eru rýmd úr økinum.

Leiðarin fyri neyðhjálp hjá ST metir, at vatnflóðin fer at raka 42.000 fólk.

Tað fjarar í økinum nærindis byrgingini, men tað fløðir aðrastaðni, og væntandi fer at fløða mest í dag.

Vatnbyrging í Kherson

Nógv fólk eru flutt burtur undan vatnflóðini. (Mynd: Ritzau Scanpix)

Einki reint vatn

Sambært Volodymyr Zelenskyj forseta, hava fólk í hundraðtúsundatali einki reint vatn. Men danska kringvarpið, sum hevur tíðindafólk í Kherson-landspartinum í Ukraina, fær hvørki váttað ella avsannað hesi tølini.

Vandi er fyri, at oyðileggingin av byrgingini við Nova Kahkovska kann fáa stórar avleiðingar fyri landbúnaðin í sunnara parti av Ukraina.

Ukraina leggur Russland undir at hava sprongt vatnbyrgingina, men Russland sigur, at Ukraina skipaði fyri spreingingini. 

Vatnbyrging í Kherson

Tað fjarar í økinum nærindis byrgingini, men tað fløðir aðrastaðni, og væntandi fer at fløða mest í dag. (Mynd: Ritzau Scanpix)