Læknavaktin: Semingsstovnurin ikki boðsendur aftur

Semingsstovnurin er ikki boðsendur aftur, síðani Kommunulæknafelagið fyri sløkum tveimum vikum síðani vrakaði eitt semingsuppskot um læknavaktina 1870.

Men Semingsstovnurin fær at vita um samskiftið millum kommunulæknar og Fíggjarmálaráðið og Heilsutrygd, sigur Terje Sigurðsson, semingsmaður.

Kommunulæknarnir boðaðu 31.mai frá, at læknavaktin á telefon 1870 í Landssjúkrahúsinum helt uppat dagin eftir, 1.juni.

Kommunulæknarnir skuldu sjálvir kunngera, hvør hevur vakt og nær.

1870 skuldi halda fram

Sama dagin, 31.mai, boðaði Heilsutrygd frá, at læknavaktin helt fram á telefon 1870.

Men tað ber eisini til at brúka telefonnumrini, sum kommunulæknarnir upplýsa.

Og læknavaktin er ikki í Landssjúkrahúsinum longur. 

Læknavaktin hevur ligið í sáttmálaloysi í meira enn tvey ár, og viðurskiftini hjá læknavaktini eru óskipað, sigur Marjus Dam, formaður í Kommunulæknafelagnum.