Noreg og Bretland samd um makrel

Noreg og Bretland hava gjørt avtalu um, hvussu fiskiskapurin eftir markeli skal skipast fyri 2023. 

Tað skrivar norska vinnu- og fiskimálaráðið.

Avtalan snýr seg millum annað um áseting av markelkvotu, um at flyta makrelkvotur og at styrkja vísindaliga samstarvið.

Noreg sleppur at fiska 135.141 tons av markeli í bretskum sjógvi.

Týðandi stovnur

Makrelur er týdningarmikil stovnur fyri Noreg, og er á øðrum plássi eftir toskin.

Tilsamans verður norska kvotan fyri í ár 245.688 tons eftir kvotaumbýtið og flytingar frá í fjør.

- Bretland og Noreg eru tvær av teimum størstu makrel-tjóðunum, og avtalan er tí týdningarmikið stig á leiðini til at fáa betri skipaða umsiting av makrelstovninum og minka veiðitrýstið, sigur norski fiski- og vinnumálaráðharrin, Bjørnar Skjæran.

- Tað hevði verið best, um vit høvdu fingið avtalu, sum eisini fevnir um hini strandalondini, og eg vóni, at norska og bretska avtalan eggja hinum strandalondunum til at gera tað sama, sigur Skjæran.