Uttanlandsnevndin viðger aftur Russland

Uttanlandsnevndin skal aftur í morgin viðgerða lógaruppskotið, sum skal geva Høgna Hoydal, landsstýrismanni í uttanríkismálum, víðkaðar heimildir at seta í verk tiltøk móti Russlandi.

Higartil hava trolvirkið Vónin, landsstýrismaðurin í Fiskivinnumálum, Vørn og løgmaður fingið innkalling at møta í nevndini í morgin.

Í síðstu viku vóru Reiðarafelagið og verksmiðjutrolarar, Faroe Agency, Mest, Pelagos, Kommunufelagið og landsstýrismenninir í fiskivinnumálum og uttanríkis- og vinnumálum í Uttanlandsnevndini og søgdu sína hugsan.

Landsstýrið ætlar at bara russisk fiskiskip, sum eru fevnd av fiskiveiðuavtaluni millum Russland og Føroyar, skulu sleppa at virka í føroyskum sjóøki, meðan onnur russisk skip ikki skulu sleppa at um- og avskipa sína veiðu her. Eisini ætlar landsstýrið, at russisk fiskiskip ikki skulu sleppa at gera umvælingar á føroyskum skipasmiðjum.

Galdandi lóggáva sigur, at bara løgtingið kann taka avgerðir, sum raka fiskivinnusamstarvið millum Føroyar og Russland. Men hesa heimild vil landsstýrið nú flyta úr løgtinginum til landsstýrismannin í uttanríkismálum, Høgna Hoydal.

Uttanlandsnevndin hjá løgtinginum fer á fund klokkan hálvgum níggju fyrrapartin í morgin.