Biden heitt á Stoltenberg um at halda fram

Sum skilst, hevur amerikanski forsetin, Joe Biden, heitt á Jens Stoltenberg, um at halda fram í starvinum sum aðalskrivari í Nato eitt ár aftrat.

Jens Stoltenberg var fyrr í vikuni á vitjan hjá Biden í Washington. 

Stoltenberg skal ikki hava svarað fyrispurninginum hjá forsetanum, skrivar NRK.

Tíðarskeiðið hjá Stoltenberg í Nato er longu runnið, men er longt fleiri ferðir orsakað av krígnum í Ukraina. 

Seinast var 30. september í fjør.

Joe Biden - Mynd: RitzauScanpix

Joe Biden, forseti, hevur heitt á Jens Stoltenberg, um at halda fram sum Nato-aðalskrivari. (Mynd: Ritzau Scanpix)

Nógvar gitingar

Nógv hevur verið gitt um, hvør fór at taka við sum aðalskrivari í heyst, ella um Stoltenberg fer at halda fram inn í 2024.

Stoltenberg var spurdur um tað á tíðindafundi seinnapartin í dag. 

- Eg havi einki at leggja aftrat. Eg havi sagt fleiri ferðir, at eg biði ikki um at leingja tíðarskeiðið. Eg havi ongar aðrar ætlanir enn at gevast, tá ið tænastutíð mín endar í heyst. Og tað havi eg sagt leingi, svaraði Stoltenberg.

Talan verður helst um at leingja tænastutíðina til næsta vár, tá ið verjusamgonga skal hátíðarhalda 75 ára dag sín á toppfundi í Washington.

Stoltenberg tók við sum aðalskrivari í Nato 1. oktober 2014, eitt ár eftir at hann legði frá sær sum forsætisráðharri í Noregi.