Blinken: Beinleiðis samskifti besti mátin at forða fyri klandri

Beinleiðis samband og beinleiðis samskifti á hægsta stigi er besti mátin at forða fyri, at kapping ikki broytist til klandur.

Tað segði amerikanska uttanríkisráðharrin Antony Blinken eftir fundin við kinesiska forsetan Xi Jinping í dag.

Hetta er fyrstu ferð í fimm ár, at amerikanskur uttanríkisráharri vitjar í Kina.

Tíðindastovan AFP skrivar, at Blinken heldur, at kinesisku politikararnir høvdu somu fatan sum hann á fundinum.

Sambandið millum USA og Kina hevur ikki verið so gott seinastu tíðina. Kríggið í Urakina er ein orsøk, og haraftrat eru ósemjur um handil og tøkni.