Seta ferð á at framleiða dronur

Russland setur ferð á hópframleiðsluna av dronum.

Tað sigur russiski forsetin, Vladimir Putin.

Hann helt í dag røðu fyri nýútbúnum hermonnum á hernaðarliga útbúgvingarstovninum í Russlandi, skrivar Reuters.

Putin sigur, at ætlanir til frama fyri herin í Russlandi verða settar í verk. 

Forsetin sigur eisini, at kjarnorkurakettir av slagnum Sarmat skjótt kunnu setast upp.

Satan 2

Raktettirnar verða í Vesturheiminum nevndar Satan 2. Tær kunnu bera fleiri kjarnorkuspreingihøvd og røkka millum heimspartar.

Putin boðaði eisini frá slíkum ætlanum í eini talu í februar.

Tá ávaraði hann um, at Russland fer at leggja størri dent á russisku kjarnorkudeildirnar, og framleiða fleiri rakettir, sum ferðast skjótari enn ljóðið.

- Vit skulu halda fram við hópframleiðsluni av luftbornu rakettunum við Kinzjal-skipanum, og fara undir framleiðslu av Zircon-rakettum, sum kunnu brúkast á sjónum, segði Putin í februar.