Forsætisráðharrin lovar frið í Fraklandi

Øll segl skulu setast fyri at skapa frið aftur í fronsku gøtunum.

Tað lovar franski forsætisráðharrin, Elisabeth Borne.

Franski forsetin, Emmanuel Macron er farin av ES toppfundinum í Brússel og heim til Fraklands júst fyri at fundast við forsætisráðharran og hinar stjórnarlimirnar, um at basa ófriðinum.

Elisabeth Borne - Mynd: Ritzau Scanpix

Elisabeth Borne, forsætisráðharri í Fraklandi. (Mynd: Ritzau Scanpix)

Og forsætisráðharrin ætlar sær at leggja nógv fyri:

- Vit fara at hyggja uppá allar møguleikar við einum endamáli: At fáa lóg og landaskil at ráða aftur alla staðni í landinum, segði Elisabeth Borne, tá hon vitjaði eina løgreglustøð uttan fyri París fyrr í dag.

Ófriður hevur verið í fleiri býum í Fraklandi hesa vikuna, eftir at franska løgreglan skeyt og drap ein 17 ára gamlan drong í einum bili týskvøldið, og nú er ófriðurin millum løgregluna og mótmælisfólk vorðin so ógvusligur, at franski forsetin kendi seg noyddan til at fara úr Brússel í úrtíð, skrivar AFP-tíðindastovan.

Emmanuel Macron - Mynd: RitzauScanpix

Emmanuel Macron, sum var á toppfundi í Brússel, kom í skundi heimaftur til Fraklands. (Mynd : Ritzau Scanpix)

40.000 løgreglufólk aftrat

Franska løgreglan hevur sett 40.000 løgreglufólk aftrat á vakt um alt landið. Kortini var aftur ófriðarligt í gjárkvøldið og í nátt, og fleiri hundrað fólk eru handtikin.

Tað var týskvøldið, at ein franskur løgreglurmaður skeyt og drap ein 17 ára gamlan drong, sum sat við rattið í einum bili. Sambært løgregluni aktaði drongurin ikki boðini um at steðga bilinum. 

Mikudagin upplýsti ákærin í Nanterre, at løgreglumaðurin er tikin og skuldsettur fyri tilætlað morð. 

Verjin, Laurent-Franck Lienard, sigur við franska miðilin, BFMTV, at løgreglumaðurin hevur biðið familjuna hjá unga dreinginum um umbering. 

- Hann er í knúsi. Hann ætlaði ikki at drepa hann, sigur advokaturin við franskar miðlar sambært danska kringvarpinum.

Undan kreppufundinum segði franski forsætisráðharrin, Elisabeth Borne, sambært Reuters, at stjórnin umhugsar allar møguleikar - eisini at lýsa undantaksstøðu. 

SÍ VIDEOBROT FRÁ AP-TÍÐINDASTOVUNI HER: