700 fólk handtikin í Fraklandi

Tað hevur verið meira friðaligt í Fraklandi í nátt í mun til tær seinastu fýra næturnar, har ógvusligur ófriður fylgdi í kjalarvørrinum av, at ein løgreglumaður skjeyt ein seytjan ára gamlan drong í einum forstaði til Paris.

Nógv løgreglufólk vóru á gøtunum. 700 fólk vóru handtikin, og hóast tað kann ljóða nógv, so er tað munandi færri í mun til undanfarnu næturnar. 

Ringast var í Marseilles, Nice og Strasbourg og í Brest var eldur settur á eina bilasølu. Í einum forstaði til Paris, rendi ein bilur inn í húsini hjá borgarstjóranum, og tvingaði konuna og børnini at flýggja.

Royndir vóru gjørdar á sosialu miðlunum at savna fólk á Champs-Elysees í Paris, men løgreglan var væl fyrireikað og handtók fleiri fólk á staðnum, so ófriður ongantíð brast á.