Nýtt oljufelag á veg

Tað er alt sum bendir á, at eitt nýtt oljufelag verður sett á stovn, og fer at geva Effo og Magn kapping.

Vit hava tosað við Hanus Hansen, stjóra í JFK Samtakinum og Tummas Justinussen í Smyril Line, men hvørgin vil gera nakra viðmerking. Teir vísa báðir til Róa Kalsø, sum vit ikki hava fingið fatur á enn. Hann segði við Dimmalætting í gjár, at hann visti meira í komandi viku. Rói Kalsø hevur verið stjóri í Demich, sum Magn eigur.

Júst JFK og Smyril Line hava verið nevnd í sambandi við nýggja oljufelagið. Hesi feløg hava ikki ognarlut í nøkrum av verandi føroysku oljufeløgunum. Enniberg hevur heldur ikki nakran ognarlut, meðan FramInvest eigur eitt sindur í EFFO.

Við hinum báðum stóru reðaríunum er søgan øðrvísi. 

Varðin eigur so mikið nógv í Effo, at felagið eisini eigur ein nevndarlim í felagnum, sum er Jógvan Dávid Jacobsen. Tað eru tó tveir størri eigarar í Effo, nevniliga íløgufelagið Tjaldur og eitt felag, sum nevnist Kolan, hjá stórreiðaranum Gullaki Madsen, sum virkar úr Danmark.

Og so er tað Christian í Grótinum samtakið í Klaksvík, sum hevur lagt boð inn at keypa íslendska ognarlutin í oljufelagnum Magn, sum er 42 prosent. Tað málið liggur í Kappingareftirlitinum at vera eftirkannað og góðkent. Tann fráboðanin kom frá Kappingareftirlitinum í apríl mánaði í ár. Tað hevur ljóðað, at reiðaríið hevði mist tolið við Kappingareftirlitinum, og hevði slept keypsætlanini. Hesum vísir Kristian Martin Rasmussen, nevndarformaður, tó aftur og sigur, at felagið einki hevur við nýggja oljufelagið at gera.

Myndin sum teknar seg er tann, at meðan tvey stór reiðarí eiga ella fara at eiga ein stóran part av hvør sínum føroyska oljufelag, so eru tað øll hini, sum standa uttanfyri og nú ætla sær at stovna sítt egna.

Hvussu nýggja oljufelagið hevur ætlað sær at virka er ógreitt, tí felagið eigur ongar tangar í landinum og teir taka tíð at byggja, so felagið fer neyvan at veita vanliga húsarhaldinum olju. Ein møguleiki er tó at keypa tangar í onkrum grannalandi ella eitt oljuskip, sum kann selja eigarunum bíliga olju. Millum annað bunkrar Norrøna vanliga tungolju frá einum tílíkum tangaskipi.