Eitt ár síðani skotini í Field's

Í dag, 3. juli, er eitt ár liðið, síðani ein maður skeyt frá hond í sølumiðstøðini Field's í Keypmannahavn.

Trý fólk lótu lív av skotunum, og sjey vóru særd.

Síðan er komið fram, at maðurin, sum í dag er 23 ár, fýra mánaðir undan tilburðinum í Field's, hevði fingið ávísing til sálarliga hjálp, men at eingin hjá kommununi hevði sett seg í samband við hann aftur.

Rættarmálið móti manninum byrjaði 12. juni í býrættinum í Keypmannahavn, og tað endar í ovurmorgin, 5. juli, tá dómur verður sagdur í málinum. 

Undir rættarmálinum er staðfest, at maðurin er sinnissjúkur, og ákæruvaldið fer eftir at fáa mannin dømdan inn á eina serliga psykiatriska deild.