Gullak Madsen stóreigari í BankNordik

Stórar broytingar eru júst hendar í eigaraskaranum í BankNordik. Ruth Holding Aps í Danmark, sum Gullak Madsen eigur, hevur keypt 11 prosent av partabrøvunum í BankNordik. Hetta hendi beint eftir, at Lind Invest í Danmark hevði selt síni 11 prosent av partabrøvunum. Tað er danski ríkmaðurin Henrik Lind, ið eigur Lind Invest.

Nógv umrødda íslendska reiðaríið, Samherji, hevur samstundis keypt seg inn í bankan. Tað er farið fram við, at íslendska felagið, Kaldbakur, hevur keypt góð 5 prosent av partabrøvunum. Samstundis hevur føroyska felagið, Framherji, í Fuglafirði, sum í síðstu viku framdi eitt ættarliðsskifti, selt øll síni góð 5 prosent av partabrøvunum í Bankanum.

Tað hevur ikki eydnast at fáa nakara viðmerking frá keyparum ella seljarum, men Birita Sandberg Samuelsen, nevdarforkvinna sigur við Frihedsbrevet, at ongin eigari hevur biðið um eykaðalfund.