Ukraina ovast á breddanum á NATO-toppfundi

Ukraina er ovast á dagsskránni, tá tey 31 NATO-limalondini í næstu viku hava toppfund í litaviska høvuðsstaðnum, Vilnius.

Og fundurin skal tryggja, at Ukraina kemur nærri NATO-limaskapi.

Tað segði NATO-aðalskrivarin, Jens Stoltenberg, á tíðindafundi í Brússel í dag.

- Ukraina verður limur í NATO. Tað er ein sterkur boðskapur, sum vit fara at senda út á toppfundinum í Vilnius. So stendur tað til Ukraina og NATO-londini at gera av, nær tað hendir. Tað skal ikki vera upp til Russland at gera av," segði Jens Stoltenberg.

Eingin tíðarætlan

Sostatt fær Ukraina onga beinleiðis tíðarætlan fyri, nær landið verður limur í NATO. 

Hevði ein slík tíðarætlan verið, hevði Ukraina komið undir grein 5 hjá NATO-samgonguni - tann sonevnda musketer-avtalan, sum ásetur, at álop á eitt NATO-land er at rokna sum álop á øll NATO-londini.

Jens Stoltenberg hevur eisini fleiri ferðir víst á, at tað ber ikki til at innlima eitt land, sum er í kríggi, upp í NATO-samgonguna. Tað hevði havt við sær, at NATO beinleiðis hevði lagt seg út í kríggið í Ukraina.