Depil til børn og ung í Sandoynni

Ein depil til børn og ung við serligum avbjóðingum skal byggjast í Sandoynni. Men enn er ikki avgjørt, í hvørjari bygd depilin verður bygdur.

Almannamálaráðið hevur lagt fram lógaruppskot um virknis- og umlættingardepil í Sandoynni til børn og ung við serligum avbjóðingum.

Depilin má ikki kosta meira enn 12,4 mió. kr. Raksturin er mettur at kosta hálva fjórðu millión um árið. Depilin verður liðugur í 2016 ella í 2017.

Depilin er ætlaður børnum og ungum í Sandoynni og í øllum landinum. Í deplinum vera átta umlættingarrúm og felagshøli til 15 fólk.

Fýra av teimum átta rúmunum kunnu seinni gerast til varandi búpláss.

Endamálið við verkætlanini er at lætta um gerandisdagin hjá foreldrum og avvarðandi at børnum og ungum við serligum avbjóðingum í eitt styttri tíðarskeið.