Svenski NATO-limaskapurin ikki avgreiddur enn

Hóast turkiski forsetin, Recep Tayyip Erdogan, hevur sagt, at Turkaland fer at góðtaka, at Svøríki fær NATO-limaskap, eru allar súðir ikki syftar enn.

Í øllum førum kann endaliga góðkenningin av limaskapinum draga út, tí leygardagin fer turkiska tjóðartingið í summarfrí, veit svenska TT-tíðindastovan at siga frá turkiskum miðlum.

Turkiska avísin, Yeni Safak, sigur hetta merkja, at Svøríki nú hevur hálvan triðja mánað til at fáa sítt avgreitt í stríðnum ímóti kurdiskum yvirgangsfelagsskapum, sum blaðið málber seg, samstundis sum ES og USA skulu halda síni lyfti mótvegis Turkalandi.

- Verða hesar treytir ikki loknar, kann ikki roknast við eini góðkenning frá tjóðartinginum, skrivar turkiska blaðið.