Hitabylgja gevur ikki endurgjald fyri avlýsta ferð

Hóast ógvislig hitabylgja ger um seg í ferðamálunum har suðuri í Evropa, er tað ikki nóg góð orsøk til at fáa avlýstar ferðir endurgoldnar.

Tað skrivar svenska TT-tíðindastovan.

- Hiti ella hitabylgja er ikki grund til at fáa pengarnar aftur fyri avlýstar ferðir, sigur Adam Györki frá ferðaskrivstovuni TUI.

Og Martina Krantz frá ferðaskrivstovuni Apollo sigur somuleiðis, at tað er bara, tá ið rátt verður fólki frá at ferðast til ávís ferðamál, at tey kunnu fáa pengarnar aftur.

Ger serlig heilsustøða seg galdandi, ið kann váttast av lækna, ber tó til at venda sær til eitt tryggingarfelag, um tað altso er hitin, ið er orsøk til avlýsingina, skrivar svenska TT-tíðindastovan.