Prísvøksturin í evruøkinum minkaði í juli

Prísvøksturin í londunum, sum nýta evruna sum gjaldoyra, minkaði eitt sindur í juli mánaði.

Prísvøksturin har er nú 5,3 prosent.

Tað er 0,2 prosentstig lægri enn undanfarni mánaði, vísa tøl frá Eurostat.

Hetta er níggjundi mánaði á rað at prísvøksturin í evruøkinum minkar. Nú minkar hann tó ikki við somu ferð sum áður.

Hyggur ein nærri eftir hesum tølunum sæst eisini at um orku- og matvøruprísur ikki vera taldir við so minkaði prísvøksturin ikki í juli. 

Og um ein hyggur eftir prísvøkstrinum í tænastuvinnuni so var hann størri í juli enn í juni. Hann fór frá 5,4 prosentum til 5,6 prosent. 

Í oktober í fjør var prísvøksturin í evruøkinum 10,6 prosent.