Skógareldar herja í Kanada

Undantaksstøða er lýst í British Columbia har vesturi í Kanada, har skógareldar gera nógv um seg.

Leiðarin í statinum British Columbia, David Eby, sigur sambært BBC, at støðan broytist skjótt, og at tað eru nakrir sera avbjóðandi dagar fyri framman. 

Túsundtals fólk verða í løtuni flutt burtur frá heimum sínum, og undantaksstøðan gevur myndugleikunum fleiri amboð at hjálpa. Undantaksstøðan merkir eisini, at myndugleikarnir kunnu seta ferðaavmarkingar til ymisk øki.

Skógareldar eru ikki óvanligir í Kanada, men hetta er ringsta summarið við skógareldum, sum tey vita um í Kanada, sigur Eby. 19.000 fólk eru flutt burtur úr býnum Yellowknife, meðan myndugleikarnir nú eru farnir undir at flyta fólk burtur úr býnum West Kelowna, har 36.000 búgva.

Sambært The Guardian eru tað fleiri enn túsund skógareldar sum brenna í løtuni og tamarhald er ikki á útvið hundrað teirra. Bara í statinum Northwest Territories, eru fleiri enn 2 milliónir hektarar av lendi farnir upp í royk higartil.