Innfluttu byggitilfar úr Russlandi fyri 155.000 kr.

Føroyski innflutningurin úr Russlandi er ikki hildin heilt uppat.

Í juni var byggitilfar innflutt úr Russlandi fyri 155.000 kr.

Hetta er nógv minni enn í mai, tá innflutningurin var 9,9 milliónir, og hann var 11,9 milliónir í apríl.

Føroyar útfluttu vørur til Russlands fyri 22,1 millión krónur í juni. 

Seld vóru brennievni og onnur útgerð til russisk skip fyri 14,4 milliónir, og makrelur og lodna fyri 7,7 milliónir fóru til Russlands.

Samlaði innflutningurin góðar seks mia. kr

Annars innfluttu Føroyar fyri 5,9 milliardir krónur í fyrra hálvári.

Hetta er nakað tað sama sum í fyrra hálvári í fjør.

Oljuprísurin er lækkaður seinasta hálva árið, og hetta sæst eisini aftur í innflutninginum. 

Innflutningsvirðið á brennievni var 891,9 milliónir krónur í fyrra hálvári.

Hetta eru 169,3 milliónir krónur, 16 prosent, minni enn í fyrra hálvári 2022.