Valstríðið hjá republikanarunum er byrjað

Amerikanska forsetavalstríðið varð skotið í gongd í nátt okkara tíð, tá tað fyrsta almenna sjónvarpskjakið varð hildið millum átta fólk, sum royna at gerast republikanska forsetavalevnið á valinum í november næsta ár.

Millum hesi átta vóru fyrrverandi varaforsetin Mike Pence, guvernørurin í Florida, Ron DeSantis, og fyrrverandi ST-sendikvinnan Nikki Haley, sum var einasta kvinnan av teimum átta.

Donald Trump, sum er nógv fremstur í øllum meiningakanningum hjá republikansku veljarunum, var ikki við í kjakinum, sum var í Milwaukee í statinum Wisconsin. Hann skal møta í rættinum í Atlanta í dag.

Republikanskt forsetavalstríð

Frá sjónvarpskjakinum á Fox News í nátt. (Mynd: Win Mcnamee/AFP/Ritzau Scanpix)

Bara tvey søgdu nei

Tá orðstýrarin spurdi tey átta valevnini, um tey fara at stuðla Donald Trump sum forsetavalevni, sjálvt um hann verður dømdur sekur í rættarmálinum móti sær, søgdu bara tvey av teimum nei. 

Sambært viðmerkjaranum hjá Fox News, kom 38 ára gamli Vivek Ramaswamy best frá orðaskiftinum í nátt. Hann segði, at hann ætlar ikki at brúka meira pengar uppá Ukraina, men vil heldur brúka pengarnar til at herða eftirlitið við meksikanska markið.

Hann kallaði eisini veðurlagsbroytingarnar fyri "bluff".

Veljarakanningarnar hava Vivek Ramaswamy á triðja plássi aftan fyri Trump og Ron DeSantis í kappingini um at gerast forsetavalevni hjá republikanarunum.