Tulka ikki upplatingartíðir eins

Løgtingsins umboðsmaður og Barna- og útbúgvingarmálaráðið tulka ikki dagstovnalógina eins.

Talan er um upplatingartíðir hjá frítíðarheimum og frítíðarskúlum.

Umboðsmaðurin fekk eina klagu um frítíðartilboð til børn í skúlaaldri.

Ansing í skúlafrítíðini

Umboðsmaðurin hevur tí spurt Barna- og útbúgvingarmálaráðið, í hvønn mun kommunur hava skyldu til at veita skúlabørnum ansing, tá skúlafrí er.

Barna- og útbúgvingarmálaráðið svaraði, at frítíðarskúlar og frítíðarheim á ein heilt serligan hátt eru tengd at skúla og skúlagongd. 

Upplating hjá hesum tilboði kann tí eisini fylgja skúlatíð.

Dagstovnalógin dagførast

Barna- og útbúgvingarmálaráðið vísti tó á, at dagstovnalógin skal dagførast í næstum.

Tá vera upplatingartíðir eisini viðgjørdar og nágreinaðar, so eingin ivi er um tær.

Umboðsmaðurin tulkar lógina soleiðis, at skulu frítíðarskúlar og frítíðarheim bara vera opin skúladagar, so eigur tað at standa í lógini.

Løgtingsins umboðsmaður ger tó ikki meira við málið nú, tí dagstovnalógin skal dagførast í næstum.