Gjaldskortupplýsingar hjá Skálkur.fo endaðar á skeivum hondum

Um tú hevur keypt á nethandilinum Skálkur.fo í tíðarskeiðnum 28. august til og við 5. september í ár, so kunnu tínar gjaldskortupplýsingar vera endaðar í skeivu hondunum. 

Tað vísir seg, at óviðkomandi hava fingið atgongd til nethandilin Skálkur.fo, og tiskil er møguleiki fyri, at hesi fólk eisni hava fingið atgongd til kortupplýsingar hjá viðskiftafólkum.

Tað stendur at lesa á heimasíðuni nethandlinum Skálkur.fo, sum er óvirkin í løtuni. 

Skálkur.fo

Sambært nethandlinum, so mæla telduserfrøðingar og bankaráðgevar viðskiftafólkum hjá Skálki.fo til at sperra gjaldskortið beinanvegin og at bíleggja nýtt.

Um fólk hava útreiðslur av at sperra og bíleggja nýtt kort, so endurrindar Skálkur.fo tær. 

Skálkur.fo skrivar eisini á heimasíðuni, at tey hava sett seg í samband við øll viðskiftafólkini, sum tey meta, eru rakt av hesum.

"Vit eru sera hørm um støðuna. Fyri at tryggja tykkum best møguliga lata vit, i samráði við trygdarserfrøðingar, nethandilin aftur til nýggi heimasíða er klár."