Kærustovnurin: Felag krógvaði vinningsbýti

Kærustovnurin hevur staðfest eina avgerð hjá TAKS um krógvað vinningsbýti.

Talan er um 17 mió. kr.

Málið byrjaði í apríl 2019.

Tá fekk TAKS fráboðan frá Skráseting Føroya um frásagnirnar hjá einum smápartafelagi fyri árini 2013, 2014, 2015, 2016 og 2017, sum Skrásetingin hevði kannað.

Talan kundi vera um skattasvik, var niðurstøðan hjá Skrásetingini. TAKS kannaði málið.

Peningur fluttur á útlendskar kontur

Niðurstøðan var, at nógvir pengar eru fluttir av peningastovnskontu hjá smápartafelagnum til útlendskar peningastovnskontur, pengar, sum ikki vóru við í rakstrinum í 2017, sambært felagsins roknskapi. 

Hetta eru, sigur TAKS, pengar til feløg ella fólk, sum tey, ið eiga smápartafelagið, hava felagsáhugamál við. 

Tað er krógvað vinningsbýti og ikki útreiðslur, sigur TAKS.

Smápartafelagið vísir hesum aftur.

Tað sigur, at pengarnir hava ikki samband við raksturin hjá felagnum.

Millumrokningarkonta

Hetta eru pengar, sum hava samband við rakstrarinntøkur og útreiðslur hjá einum skipi, sum annað felag eigur, og sum smápartafelagið er í samtaki við.

Felagið hevur tí bókað peningaflytingarnar um millumrokningarkontu.

Kært var til skatta- og avgjaldskærunevndina, men hon gav TAKS viðhald.

Talan er um krógvað vinningsbýti sambært kapitalvinningsskattalógini, er niðurstøðan.