Endurgjald fyri arbeiðsskaða skal fylgja lønarvøkstrinum

Løgtingið skal í dag viðgera uppskotið hjá landsstýrinum, um at endurgjald fyri mist vinnuføri eftir arbeiðsskaða skal fylgja lønarvøkstrinum.

Sum nú er minkar tað í veruleikanum, - realvirðið minkar, so hvørt sum lønir fara upp.

Dømi í lógaruppskotinum er, at fólk fekk 180.000 kr. í endurgjaldi í 2011.

Endurgjaldið er tíggju ár seinni, í 2022, framvegis 180.000 kr. um árið. Onnur endurgjøld eru hækkað sløk 23 prosent.

Arbeiðsskaðatryggingarlógin skal eisini broytast, tí pensjónsaldurin hækkar.

Eftir tingfundin í dag verður næsti tingfundur 19.september.

Tingfundurin í dag er klokkan tíggju.