Dátueftirlitið flytur til Saltangará

Dátueftirlitið flytur í ovaru hæddina í bygninginum við Heiðaveg 25 í Saltangará seinni í heyst.

Dátueftirlitið leigar frá smápartafelagnum Heiðahúsi.

Leigumálið byrjar 1.november.

Hølini vera nú umvæld, og arbeiðið skal vera liðugt síðst í oktober.

Løgmaður kunngjørdi flytingina

Bárður á Steig Nielsen, kunngjørdi í august í fjør, tá hann var løgmaður, at Dátueftirlitið skuldi flyta á eystara arm á Skálafjørðinum.

Í fyrsta umfari var sóknast eftir fráboðanum frá áhugaðum útleigarum. 

Freistin at lata fráboðan um leigumál var til 14.oktober. Men tað gav ikki úrslit. 

Men nú er so leigusáttmáli gjørdur við Heiðahús.

140.000 kr. eru í fíggjarlógini til flytingina.

Fimm starvsfólk

Dátueftirlitið er óheftur fyrisitingarmyndugleiki og stovnur undir Løgmansskrivstovuni. 

Dátueftirlitið virkar sum skrivstova hjá Dáturáðnum, og hevur eftirlit við og virkar fyri, at dátuverndarlógin verður hildin. 

Á Dátueftirlitinum eru fimm starvsfólk.