Meira enn hálv millión ferðafólk við Bygdaleiðum í ár

Stórur vøkstur er í ferðafólkatalinum við Bygdaleiðum, og Strandferðslan væntar, at millum 530.000 og 535.000 fólk fara at brúka Bygdaleiðir í ár.

Hetta er tað mesta síðani 2012.

Við ársbyrjan metti Strandferðslan, at  vøksturin í ár fór at verða umleið 10-15 prosent. Og til og við august hevur vøksturin í ferðafólkatalinum verið 12 prosent.

Tað upplýsir Dennis Holm, landsstýrismaður, í svari til Eyðgunn Samuelsen, løgtingskvinnu, sum hevur spurt um málið.

Minkað síðani 2012

Ferðafólkatalið á nærum øllum leiðum hjá Bygdaleiðum minkaði frá 2012 til 2020, og koronufarsóttin hevði við sær, at enn færri brúktu bussarnar. Síðani í fjør hevur verið ein munandi vøkstur, og málið er at koma upp í 650.000 ferðafólk í 2025. 

Dennis Holm sigur, at  Strandferðslan ætlar at fáa í lag samstarv við kommunurnar um at samskipa koyringina hjá Bygdaleiðum og staðbundnu busskoyringina betur, so borgararnir fáa betri tænastu. 

Hann sigur eisini, at ætlanin er ætlanin er at skipa fyri almennari hoyring um almennu ferðsluna á landi í framtíðini. 

Svarið frá Dennisi Holm til Eyðgunn Samuelsen kann lesast her.