Næstan 45 milliónir í kapitalvinningsskatti fóru av landinum

So nógv vinningsbýti fór av landinum í fjør, at landskassin noyddist at rinda aftur 44 milliónir og 627.000 kr. í kapitalvinningsskatti í fjør.

Hetta skuldi landskassin rinda partaeigarum uttanlands aftur.

Treytin fyri at fáa kapitalvinningsskattin endurrindaðan er, at tann, sum eigur partabrøvini og fær vinningsbýtið, býr uttanlands. 

Tað stendur í frágreiðingini hjá Landssgrannskoðanini um frávik millum játtan og nýtslu í 2022.

Frágreiðingin er latin løgtingsgrannskoðarunum.

Í fjør var roknað við 290 mió. kr. í kapitalvinningsskatti í fíggjarlógini.

Endaliga talið, roknskapurin, gjørdist 42 milliónir minni.

Landsstýriskvinnan í fíggjarmálum hevur greitt frá, at í høvuðsheitum er talan um frávik,
sum stavar frá, at kapitalvinningsskattur í størri mun enn árini frammanundan er afturrindaður. 

Serliga BankNordik

Orsøkin er samansetti eigaraskarin í feløgum, sum lata vinningsbýti, serstakliga í BankNordik. 

Eisini tí, at talan í ávísan mun er um afturrindan fyri kapitalvinningsskatt í nøkur ár, serstakliga fyri BankNordik fyri 2021.

Í 2021 var afturrindaði kapitalvinningsskatturin 3,6 mió. kr., og hann var 5,9 milliónir í 2020.

Landið fekk nógv vinningsbýti

Men landið fekk 74,5 mió. kr. meira í vinningsbýti frá teimum feløgum, sum landið eigur ella eigur í.

Landið 166,2 mió. kr. Í fíggjarlógini fyri 2022 eru 91,7 milliónir.

Landið fekk 1,1 millión frá Elektron, 30 milliónir frá Føroya Tele, 134,4 milliónir frá BankNordik og landið fekk 652.000 kr. frá Tjaldri.