Høgriflokkurin vann kommunuvalið í Noregi

Høgriflokkurin vann kommunuvalið í Noregi í gjár.

Tað var greitt, tá 99,7 prosent av atkvøðunum vóru tald, skrivar NRK.

Høgriflokkurin fekk 25,9 prosent av atkvøðunum, og norski javnaðarflokkurin, Arbeiðaraflokkurin, fekk 21,7 prosent. 

Norski forsætisráðharrin, Jonas Gahr Støre, viðurkendi í nátt, at hetta ikki var úrslitið, ið hann hevði væntað. Hetta var ringasta valið hjá Arbeiðaraflokkinum í nærum hundrað ár.

Jonas Gahr Støre

Jonas Gahr Støre og Arbeiðaraflokkurin taptu kommunuvalið so dyggiliga. (Mynd: NTB/Ritzau Scanpix)

- Vit væntaðu eitt torført val, og tað var tað eisini. Hetta er ikki nóg gott, segði hann við sjónvarpsrásina TV2

Erna Solberg, forkvinna í Høgraflokkinum, er sera fegin um úrslitið.

- Hetta er fyrstu ferð síðani 1924, at Høgri er størsti flokkur í landinum. Vit fara at liva upp til álitið, vit hava fingið, segði Erna Solberg við tíðindastovuna, NTB.