Landið skal lata 30 milliónir til stórhøllina í Hoyvík

Sirið Stenberg, landsstýriskvinna í mentamálum, hevur biðið løgtingið um heimild at lata 30 milliónir kr. í stuðli til stórhøllina í Hoyvík.

Í 2018 skrivaðu allir floksformenninir á løgtingi undir eina fráboðan um, at teir vilja veita stuðul til verkætlanina Føroya Arena. 

Samtykt var at játta tilsamans 30 milliónir kr. til verkætlanina í fíggjarárini frá 2022 til 2025.

Fimm milliónir kr. vóru settar av á fíggjarlógini í fjør og fimm milliónir aftrat á fíggjarlógini í ár.

Sirið Stenberg

Sirið Stenberg, landsstýriskvinna í mentamálum. 

20 milliónir aftrat

Ætlanin er at stuðla  verkætlanini við  tilsamans 20 milliónum aftrat í 2024 og 2025, so samlaði stuðulin frá landinum verður 30 milliónir kr. 

Stórhøllin fer at kosta meira enn 200 milliónir kr., og Tórshavnar kommuna hevur bundið seg til at rinda helvtina av kostnaðinum, tó í mesta lagi 132 milliónir kr.

Aftrat løgtinginum hava fólkatingið og privatar grunnar eisini játtað at stuðla verkætlanini. 

Byggifelagið Articon byggir stórhøllina, og væntandi verður høllin liðug í 2025. 

Uppskotið hjá Sirið Stenberg kemur til fyrstu viðgerð í tinginum hósdagin.