Grønland: Tvey landsstýrisfólk lagt frá sær

Nú grønlendska landstingið varð sett í gjár og fer undir nýggja setu, er longu greitt, at fleiri broytingar standa fyri framman.

Tvey grønlendsk landsstýrisfólk hava lagt frá sær, bæði landsstýriskvinnan í heilsumálum og landsstýrismaðurin í fiskivinnumálum, og tí skulu kortini blandast av nýggjum.

Mimi Karlsen legði frá sær sum landsstýriskvinna í heilsumálum, tí hon avloysir Kim Kielsen sum forkvinna fyri landstingið.

Og Karl Tobiassen legði frá sær sum landsstýrismaður í fiskivinnumálum, tí hann ikki hevði nátt málinum um at gera uppskot til nýggja fiskivinnulóggávu.

Sjálvstýrismál
Grønlendska kringvarpið, KNR, veit frá álítandi keldum at siga, at Siumut í hesum sambandi barslast við ætlanum um, at eitt landsstýrisfólk skal setast at umsita sjálvstýrismál.

Eitt sovorðið ráð var frá 2016 til 18, og tá fevndi tað um sjálvstýrismál, uttanríkismál og landbúnað.