Emerald til Tromsø eftir fólki og útgerð

Trolarin Emerald er nú á veg til Tromsø, har hann skal taka fólk og útgerð umborð.

Haðani fer hann so antin til Svalbard ella í Smoguna at fiska rækjur, sigur reiðarin, Kaj Johannesen.

Skipari er John Mikkjal Godtfred. 

Hin skiparin, Jákup Joensen, er eisini við. Hann er stýrimaður hendan túrin.

Emerald fór av Havnini beint fyri midnátt leygarkvøldið.

Nú eru skjótt triggir mánaðir síðani Emerald fór úr Turkalandi, har hann er bygdur.

Á veg til Havnar var hann í Hirthals og í Vági.

Kom 13. juli

Emerald kom á Havnina 13.juli. Men tað vísti seg, at nógv var eftir at gera umborð.

Spølini riggaðu ikki, sum tey skuldu, og heldur ikki verksmiðjan.

Emerald var tveir royndartúrar undir Føroyum, og ein túr eftir rækjum.

Emerald kann fiska rækjur í altjóða sjógvi í Barentshavinum og í Norska havinum.

Hann hevur trý fiskiloyvi.