Biðja um eykajáttan til tunlarnar, so arbeiðið ikki steðgar

Arbeiðið upp á tunlarnar Norður um Fjall gongur so mikið væl, at verður ikki meiri peningur játtaður nú, er vandi fyri, at arbeiðið steðgar í heyst.

Landsstýrið biður tí um 40 milliónir kr. i eykajáttan.

Játtanin í ár er 130 milliónir kr.

Tað fer at hava við sær, at arbeiðið verður skjótari liðugt, og at verkætlanin samanlagt verður bíligari, sigur Fiskivinnu- og samferðslumálaráðið.

Í fíggjarlógaruppskotinum næsta ár eru 150 milliónir kr. settar av á løguætlanini at gera tunlarnar lidnar. Men verður eykajáttanin latin nú, kann játtanin í 2024 lækka 40 milliónir kr.

522 milliónir

Sambært verklagslógini um tunlarnar Norður um Fjall skal alt arbeiðið kosta tilsamans 522 milliónir kr., og tað skal eftir ætlan verða liðugt í 2024.

Fiskivinnu- og samferðslumálaráðið biður eisini um 10 milliónir kr. í eykajáttan at leingja leigusáttmálan um Herjólf III, tað sum eftir er av árinum til farmaflutning á Suðuroyarleiðini.

Uppskotið um eykajáttan frá Fíggjarmálaráðnum fyri september hevur góðar 54 milliónir kr. í halli.

Sí uppskotið um eykajáttan her.