Vilja styrkja samstarvið við ES

Landsstýrið vil styrkja samstarvið við ES.

Høgni Hoydal, landsstýrismaður í uttanríkis- og vinnumálum, hitti í gjár ES-nevndarlimin í handilsmálum, Valdis Dombrovskis, á fundi í Brússel.

Teir umrøddu ætlanina at menna eitt sterkari og meira fjøltáttað samstarv millum Føroyar og ES.

Landsstýrið vil styrkja handilssamstarvið við ES, sum kann tryggja føroyskum framleiðarum og útflytarum betri marknaðaratgongd til ES-marknaðin fyri virkaðar fiskavørur.

Nýggja geopoltiska støðan ger, at tað er meira umráðandi enn áður at styrkja viðurskiftini millum Føroyar og ES, sigur Høgni Hoydal, landsstýrismaður.

Høgni Hoydal sigur eisini, at hóast Føroyar longu hava eitt samstarv við ES á fleiri økjum, eru góðar vónir um, at útlit eru fyri at menna viðurskiftini, ikki minst á handilsøkinum.