Hægri renta krevur størri rentustuðul

Hækkaða rentan ger, at landsstýrið biður um 11 milliónir aftrat til rentustuðul í uppskotinum um eykajáttanarlóg, sum kom í tingið fríggjadagin.

Hetta er nettotal, tí útreiðslan er 20 milliónir og inntøkan níggju milliónir.

Í fíggjarlógini fyri 2023 var útreiðslan mett at vera 109 mió. kr. og inntøkan 47 milliónir.

Næsta ár er mett, at landskassin skal rinda 141 milliónir í rentustuðli.

Inntøkan verður 61 milliónir. So nettoútreiðslan til rentustuðul verður 80 mió. kr. næsta ár.

Í 2022, áðrenn rentan fór at hækka av álvara, var útreiðslan stívar 86 mió. kr. og inntøkan slakar 39. 

Og í 2021 var rentustuðulin stívar 79 mió. kr., og inntøkan tá var slakar 36 mió. kr.